وكالة الرأي العربي الإخبارية
قصيدة زجلية
شحال بكيت سر ؤبكيت جهارة
على يام النخوة ؤالمروة ؤالعزة
يام كان الحليب صافي بالفرارة
ؤ جات يام الهم ؤ يامات الحزة
دارت دورتها هاذ الدنيا الغدارة
رجع الهم فوق الراس بحال رزة
رجع الجلد ناشف بحال الحمارة
ؤكل شبر مغرز بشحال من غرزة
ؤ تحشو الرجلين بمناجل تمارة
ؤ الفقر لاصق فينا كاز علينا كزة
مشات يام كنا تحزيمت الغمارة
وجات ليام لنسعاو فيها الخبزة
كنا صغار ؤ قادرين على ليغارة
رجال حرار ؤ نفهمو غير بالغمزة
ؤ باش تعرفو الدنيا راها دوارة
جات يامات الدفيع ويام الدبزة
حگرت عل شيبنا الدنيا الحگارة
عطاتنا الطول حتى فرزتنا فرزة
تصورتها مرا زينها فتان ؤغرارة
حبها يسلب القلب يوخزو وخزة
الدنيا مرا ببهوج كلماتها ثرثارة
تجرك لهواها واخا طارت معزة
ماتبقى تفرق بين ربح وخسارة
ماتفيق وخا تهمز بالمهماز همزة
ياما عاشرت من القوم البحارة
الهموم مطرزة فدواخلهم طرزة
طاحو فإدين شي وحدين گزارة
المخير منهم محسوب غا همزة
حسن صبي
..
