وكالة الرأي العربي الإخبارية
مافيش راجعه
**********
يامشيه ف دنيتك بالكيف
وتركاني
وسيبالي هموم بالكيل
وقلب عليل ونسياني
ياعايشه بنبضك الكداب
قفلتي الباب ولاموارب
وقلبك م الهوي هارب
مافيش نظرة أمل منه
مع إنه شغلني كتير
تركتيني ف قلب النار
باعاني الهم والحسرة
وبعتيني بدون إنذار
رضيتي الذل والكسرة
وبدّلتي فرح قلبي
بهم وغيم
وقررتي أعيش حزني
بهجر غشيم
فعيشي ف دنيتك حره
وإنسيني
وأوعي تعودي لو مره
تصالحيني
أنا كرهتك
كرهت كمان حروف إسمك
رميت الحزن جوايا
وسكّنته
عاهدت القلب علي كرهك
وأمّنته
خلاص بكره اهو جايلك
ماتتبصطيش
ساعات الحزن هترافقك
وماتعديش
متفتكريش
بإن القلب مفتوحلك
ولاحبي كدا ع الكيف
ومسموحلك
فأحسنلك
بلاش تيجي هنا قصادي
ولاتقولي سماح وخلاص
خلاص قلبي عليه أقفال
بإهمالك لدقاته
مافيش راجعه لايامك
ومن تاني
