وكالة الرأي العربي الإخبارية
أرض النيل
***********
صباح طاهر ومتوضي
صباح نادي صباح فضي
وشمس شروقها
علي أرضك هناك بتطل
صباح الفل أراضيكي
جمال بيطل
صباح الحسن يتمخطر
بشال أخضر
وعاجبه نور قناديلك
نجوم ليلك تضويله
ياست الكل
صباح خيره كمان دايم
وصلي الفجر مش نايم
وماشي للتكال بالله
وبيدندن وبيغني
قصيدة عشق ف عيونك
بتوب ابيض كما قلبه
بيتعايق علي نيلك
ويتمخطر ويتغندر
علي عشقه لمواويلك
وماشي برجله بيدبدب
مكان مايجب
ومهما كد وف يومه
ولاحسش بانه كَل
ومهما كان تعب يومه
دا ف قدومه
ولابيتعب ولا بيمل
يشوف لمه ف وسط الدار
تعب مشوار يروح منه
ومين شايل بايده عصير
حصير مفروش
ووش بشوش
وصوت قرأن
لطبلاوي
وصوت طوبار
يخلي الكل يسمعله
وضربة مدفع الافطار
ودعوه بألف رحمه تحل
دا شهر الصوم
علي ارضك
مالهش مثيل
يامصر ياغاليه ف قلوبنا
يا أرض النيل
جمال الليل حواريكي
شوارعك حتي كباريكي
ومهما العمر طال بينا
فانت العشق مش غيرك
وأرواحنا فدا ليكي
عشان تعلي وفوق الكل
الكاتب محمد فرغلي
