وكالة الرأي العربي الإخبارية
زجلية: البساط من ديوان (طرز الحروف)
✍️✍️✍️
البارح بالليل
تفكرت ذاك البساط
وشحال كان طويل
صوفو مسدي فقلب الدار
مغزول بعود من العرعار
سدّيت سداه
و گلست حداه
✍️✍️✍️
آه …
يا بساطي آه
أنا للي نسجتو بحروف العرف
عرف ناس العز و النخوة
عرف ناس البهجة و الكَرام
عرف أهل السلم و السلام
هذاك بساطي ..
✍️✍️✍️
آه يا بساطي
بساطي
بساط النشوة
فَـرّْشوه أهل النخوة
حفظو عليه جميع الطلبة
جميل الأوصاف
حاضر فلمة لَـفْراح
بساط طويل …
طويل بطول الليل
شتفة تابعة شتفة
كل شتفة بيها راضي
عُمرو ما صاح
ولا شي نهار ٱتقَصَّح
وگال آاااح
كيف البَكْمة
كيف الأشراف
و بزاف و بزاااااف
✍️✍️✍️
عليه سبحو وقراو
عليه كتبو وحكاو
وياااااما خرايف
على لسان لعجايز ٱتَّرْوات
كيف حكايات زمان
حكاتها للصبايا
حكاتها للصبيان
حكاتها ليك أنت يا إنسان
✍️✍️✍️
.. مگوااااايا مگوايا
هدي بداية الروايا
ع البساط للي منشور حدايا
مگوااااايا ..مگوايا
اليوم تهرقات الدواية
مدادها تكفح وشاط
وٱلســمغ وسّخ البساط
اللون كشف
وحــار مــعايا
✍️✍️✍️
گال ليا ..آجي بالخف
آجي نْـرَجعو الزّْمان
ننساو اللي كان
هذا يوم الحَـزّة
و باش يعم الخير
كيف گالها خويا لغدير ( أحمد حمادي لغدير)
آجي نوحدو لكلام
آجي نلوحو الخوف
آجي نجمعو الصوف
كل دزة يا دزة
ٱجي نسجو بساط جديد
والمنسج يكون حديد
حَرف يبدى بالحضانة
وحرف يبقى ضمانـة
و البساط علينا شاهد
وعارف قَـلب الرُّمانة ..
ذ.الراجي رمالي
11/01/2022
