التخمام…زجل بقلم أحمد لغدير

زجل ..التخمام
☕✍️
ٱعطيني ورقـة
.. ورقة بـيضة
وما يْمْشِـيشْ بالك للـزّرقٓة *
ٱعطيني ٱدوايـة وقـلم
وخـلليني ..
زااااهي فالتخمامْ
☕☕
خلليني ..
بـيني و بـيني
لا تقاطعني فْـكلامْ
أنت گول .. الله وٱعلم
وأنا نْحْلـف و نْـجْزْمْ
بْـللّي الحروف
تغادر ٱرفوف عقلي
والمجهول يطرطق
سلاسل الخوف
و بحال ٱگرانو يحلم
☕☕
يحلم ..بعاااالم
ضاحك ٱمبٓسّْمْ
و الـبسمة كبـييييرة
نـاااااااازلـة
قـطرة .. قـطرة
مـن مْـدادْ قـلبي
تْحسْ بالحب فالنّـبرة
وبحضِّي فالتخمااااام …
*200درهم مغربية
🌿🍒☕
راك تم
✍️ في حينها وتحيينها
24 -02-2021