شُفت الشمس؟ 

الرأي العربي .. عادل عثمان الحجار – مصر

شُفت الشمس بتطلع ليك ؟
إوعي تغمض قلبك مره …
أو تنكرها ف مرة عينيك
أمك شمسك ..
يومك أمسك
كل الدنيا / لما تجيك
لما الفرع يحن لأصله
واما بكل العمر يواصله
إوصل أمك
لازم تعرف فين أراضيك
من غير أصلك ..
كل الدنيا / هتدوس فيك
إسأل نفسك ..
لما بتبرد وانت صغير ..
مين كان يبرد ويدفيك ؟
لما الجوع بيجيلك مَرَّه ..
تصرخ صرخة قاسيه ومُــرَّه ..
مين وف جوعه / بيغذيك ؟
جاوب قول لي …
مين غير أمك ويَّا أبوك ..
طول العمر دا عايشين ليك ؟
قول لى شعورك ..
لما بتسمع كلمة أم
قول إحساسك
واسأل ناسك ..
مين كان شايلك وأنت صغير ..
طول العمر بيزرع ليك ؟
إسأل قلبك ..
وانت صغير ..
مين بجناحه يطمن فيك ؟
مين شريان الحب الصافى ؟
جوا البرد ..
قلبك يصبح حلو ودافى ؟
إسأل نفسك .
مين من خوفك بينجيك ..
بعد المولى ؟
وانت صغير ..
من غير قوة ..
من غير حولَ
قوم روح يللا ..
إوعى تتوه فى العيشه الزحمه
قدم دعوه / فيها الرحمة
إسمع منِّى
ياللى شموسك زاهيه وطالعه
مش مطلوب تعبير ومطالعه
قول من قلبك ..
قولها لأمك
إنِّك روحى ونبض القلب
إنك ليَّا السما والأرض
إنتِ السنه …
وانتِ الفرض
ضم إيديها وبوسها بحب
ياما بشوق باست فى إيديك
شفت الشمس ..
ولَّا حلفت تغمى عنيك ؟
=======
الشاعر .. عادل عثمان الحجار
ـــــــــــــــــــــــــــــــــــــــــــــــــــ