وكالة الرأي العربي الإخبارية
زجلية : القلم و اربعين حرامي
اعطيني القلم حط لي الدواية
نكتب على حظي ألف حكاية
ندون تسعة و اربعين رواية
نكتب على النجوم العابرة
في هااااذ الأياااااام الغابرة
☆☆☆☆☆☆☆☆
نكتب نكتب نكتب ما نمل
نكتب على ذيك العرافة
اللي عييت فيها ما نسأل
هزت ليا خط زناتي بالرمل
ما لگات لي لا جواب لا حل
تسدو فوجهي گاع البيبان
كل باب بمية وعشرين قفل
ما خلاو ليا و لا منين نطل
☆☆☆☆☆☆☆☆نكتب على اللي ضاع من ايامي
نشمر على دراعي ونعگد حزامي
نجمع حروفي ونوزن كلامي
نكتب ديوان على اربعين حرامي
نكتب بدمي وعرگي واحد خاص
على الكلام اللي طاح و رخاص
على ذوك اللي سفهو احلامي
حتى حرگت وراقي وهرست قلامي
☆☆☆☆☆☆☆☆نكتب نكتب واخا النفس تهدات
نكتب على المناصب اللي تبهدلات
وسط كوانن نارها گدات ودلعات
ف ابراج كانت من گبل عليهم منعت
اليوم بالحظ ليهم طلعت وصدقت
☆☆☆☆☆☆☆اعطيني القلم حط ليا الدواية
نكتب على ذيك العصابة
بالدينار والسبحة ولاو نصابة
اللي البارح كانو بحال الطلابة
اليوم فصلو من الحرير جلابة
وفي السواد العظييم شدو القشابة
وكحو المطافي خواو المطامر
حلفو حتى يجمعو گاع الصابة
☆☆☆☆☆☆☆☆وريناهم المناصب من الكوانن
لحسو القلالش وطرگو الگيع
بلا رحمة جمعو لينا حب وتبن
اعطيني القلم وحط ليا الدواية
عطيني ودنك و خليك حدايا
نحكي ليك واقع ماشي حجاية
رويتها ليك عالخاطر و غي بالفن
الشاعر و الزجال : 
