وكالة الرأي العربي الإخبارية
شعر شعبي اهوازي
عنوان القصيدة ( امي ماتت)
امنين اجت ،هاي المنيه و عشعشت، بفراحنه و ناحت حزن
و امنين هاي الساعه گشره و، وگفت بنص المحطه و زنجرت، باخر وداع
وکل بنادول المدینه غنّن النه ابلا وزن
ليله وحشه و ماتت الجنة و برد بينه الحنان
و گرفصت روحي و خواتي بطول امي
و ما طلعنه انخاف نعثر
نعثر بثاني يتم
اتگرفصينه و فوگ چف امي اندعيت
ربي لا يطلع فجر
ربي لا يگعد بشر
ولا يفز شارعنه بصوات المدارس
البين شارس
و كون تتخورس جهازات السلف
ولا اذان ايفزز الدفان ياخذ، من خواتي العافيه
ساعة وكحه و بينه تركض حافيه
الليل هندس والگمر علفرگه ناوي
و مدري ياهو الباگ من وحشتنه صوت
و فزز الحيطان والتمت نعاوي
و مدري يا متن التزورگ، هد لچم بينه الجرح
ومدري ياهو الجاب ،عبدالباسط ايرتل ملح
مدري ياهو
مدري ياهو
ليل هندس والجفون امگبعات بصوت گوّالت قدیمه
يا حريمه
(شايله ام البيت لو زعلانه )
و البيت شگ زيجه و لطم
والطوفه هدت روحها الچانت تگود امي الفجر لله
فز يمحراب الصلا بينه الحزن صلا
الله لا ينطي الشمس شرگت غروب
و هوّس الميدان غبشه
(الشالو نعشچ كلها اسباع و وهامه)
وگرفصت، روحي و خواتي و بينه ماتت چم غزاله
چم ربیع
واتلولح امن ازلوفنه ثلج الشته
زهرا جبار
