وكالة الرأي العربي الإخبارية
زجل مغربي
قصيدة دگ يا المهراز
بقلم فدوى گدور
دگ يا المهراز دگ …طحن ولين
جهر بحالتنا… صرخ …تكلم
طاح علينا الضيم رشنا الهم
كلشي يبكي و يشكي كلشي مألم
دگ يا المهراز دگ…طحن ولين
شبابنا الحنين…ضاع تهدم
تسدو فوجهو البيبان
ميعرف واش يتأخر ولا يتقدم
غير غادي ويخمم
دگ يا المهراز دگ …طحن ولين
شحال من واحد كان البارح مهدن
لبيب بعقلو ومرزن
صبح اليوم تالف معصب
غي غادي بسخط ويشتم
دگ يا المهراز دگ…طحن ولين
عايشين في الحرمان
كيف الشتا والصيف
كيف الربيع و الخريف
فالارض الجفاف والجو مغيم
شي فالسم يبرم…
شي فالعفن يشم….
شي بالدسارة يتكلم….
و شي فالمعاصي غارق
مايهمو هدا حلال وداك محرم
وجه قاصح مايحشم
دگ يا المهراز دگ …طحن ولين
ترزا فصحتو وشبابو تدفن
شكون يشد بيديه راه غريق مردم
شكون يحس به وعليه يحن
شكون يخرجو من تحت الردم
دگ يا المهراز دگ …طحن ولين
راه الحال مأزم
صغار وكبار كلشي غادي للحافة
كلشي مگدم
دگ يا المهراز دگ… طحن ولين
فينكم يا أصحاب القرار
التنمية والرصيد المدعم
ياك قلتو البلاد بشبابها تقدم
فين هي مراكز الإصلاح
فين هو الحل ؟؟؟؟؟؟
كفاش يزول علينا هاد الهم
وانتم يا لي تبيعو لولادنا الوهم
واش معندكم ضمير معندكم ولاد
ولا مكيهمكم غير الدرهم
غدا عند فورة يبان الحساب
ولي دار الذنب لازمو يندم
ملاحظة: اللوحة الفنية من أعمالي أتمنى أن تروقكم
