د – عبد الهادي الشعراوي – نفسي أعيش

نفسى أعيش
…………
الثورة خلعت يابا توبها
والجانى حالف مايفوتنا
بيتاجر ف اخضر مع يابس
ولا همه عيشنا ولا موتنا
***
الثورة صنعت تجار
من جوه ومن خارج الدار
دنيتهم درهم ودولار
إحتكروا حتى مواريدنا
***
بدأوها برز مع سكر
وتجارة فى الورق الاخضر
لجشعهم فتحوا ميت مصدر
وإحنا ساعدناهم بسكوتنا
***
إحتكروا كل الأدوار
وإرتفعت كل الأسعار
مواريدنا ضربوها بالنار
علشان الهم مايفوتنا
***
وجنيه إتعوم فى دقيقة
خنقوه وسابولنا الضيقة
بيحاولوا يعملوا تفريقه
لوحدة اراضينا وبيتنا
***
ياحكومة عمالة تتعذر
بعيونك بصى على المنظر
ملِينا من ضبط ومحضر
إقتصى من ناهب قوتنا
***
يامجلس عايش ف الماضى
جلساتك كلها ع الفاضى
عايزين السرعة من القاضى
ثغرات الدستور تعبتنا
***
ياريس تفويضنا عشان
تحمينا وتحمى الأوطان
وحقوقنا ناخدها بأمان
وتزهزه وياها حياتنا
***
البعض عمال يحتال
وهمومنا ع الكتف تلال
من ظلم رجال الأعمال
بيتاجروا بدوانا ومرضنا
***
إذدادت كل الأمراض
وإنتهكت كل الأعراض
والكيل م الهم اهو فاض
ودوانا مانمتلكه بإيدنا
***
ياريس أنا كلى كسور
نفسى بس أعيش مستور
ولا عايز للساحل أزور
ولا أصيف على نشو بلدنا
***
نفسى ألاقى لقمة عيش
ويخف حملى عن الجيش
نفسى ولادى بأمن تعيش
ولا تاجر ينهش جتتنا
***
نفسى الحلم يبقى حقيقة
نفسى أحس بكل دقيقة
لما أشوف أسباب الضيقة
منهى عليها وتحيا بلادنا