وكالة الرأي العربي الإخبارية
قصيدة عامية
#سؤال_وجواب
بتسألينى مين أنا؟
نفس السؤال من كام سنه
ونفس الاجابه هيه هيه كل يوم
أنا القلب اللى مات م الخوف
أنا الضحكه اللى صابها كسوف
وأنا العين اللى مش بتشوف
غير الحزن دا نصيبها
ولو ضحكت فى يوم غيره
يكون الرد م اللايمين
يقولوا الفرح دا عيبها
بتضحك رغم كوم أوجاع
بتضحك رغم اللى ساب وباع
بتضحك وضحكها خداع
سنين والدمعه دى نصيبها
مكتوب ع عيونى
تفضل تسح دموع
مكتوب ع قليبى
يفضل كدا موجوع
ومركب الفرح بتعافر هناك ف البحر
ومين يقدر يقربها
بتشاور عليك احزانك ف كل مكان
بتاخدك حضن بطول العام
متعرفش هيه …….
يعنى ايه كلمة حرام؟
وازاى إنت يا مسكين
هتهرب منها وتسيبها
وازاى والطيبة دى سكناك
تقدر تسايسها، تلاعبها
مهما حاولت تهرب يوم
هتصيبك آلاعيبها
فسوق الخوف لحوش قلبك
وطمن خوفك الزايد
راحوا الحبايب….
ومين هنا يسكن تانى
تعال يا قلبى يا خالى
نسيب الفرح ونعانى
ونلحق دنية الأحزان … فى صباها
يا بنى نصيحة
مش كل حزن يتقال عليه
وجع وجراح
ولا كل فرح تشوفه العين
يكون هنا وبراح
دا حتى الطير فى وقت الدبح
ناس كتير بتشكك فى وجع الموت
بتقول عليه….. ماله كدا؟
بيرقص من كترة الأفراح
#الطيب_عوض_أحمد
