وكالة الرأي العربي الإخبارية
قصيدة هزلية بالعامية:
شايب العزارة
هذا واحد شيباني
منطيح و مفلس
عينيه واسعات و قابات
بحال الدحيش
الدراع گاضي
اللسان ماضي
كيف المقَيّص
~~~~~
مسخوط لصحاب
كبر و عاب
شاخ و راسه شاب
و على رباعة الشياب تريس
~~~~~~
بااااقي معزري وسط الدوار
عام على عام غادي و كيصغار
ما زال يدوح……. ما زال ينقز
ما زال يهز ………ما زال يعبز
و ما زال ينشط و يهيص
~~~~~~
واحد النهار يا حضار
كان گاعد ما عليه ما بيه
گال مع راسو شنو ندير؟؟
گال آرا حتى أنا كيف الناس
نضرب الكحل ف البيض و نعرس
~~~~~~
كلا و حاله
شمر و كفض على سرواله
ضبر على فردة بحاله
غطاية و إناء
يخلق الله ما يشاء
عروسة متعوسة
جنانها ضربه الخريف
غي شجرة من الغلة مسيوسة
و نهار عرسه بلاه ربي
شرب و طيس
و على راسو ما قيس
~~~~~~
آشمن شطيح هذا
واشمن رديح
غادي كيتمايل
ينوض و يطيح
و فذاك النهار ربي يعطي خيره
كان الما(ء) يدي … الما(ء)
و الشتا خيط من السما
وصل للخربة گاع مغيس
~~~~~~
خاف من الفضيحة گدام الناس
تكمش و حنى ذاك الرويس
دخل لنوالته يتمخشش كيف النميس
مللي سولوه
فين دعتي
فين غبرتي
دار فيها سبع
ولى غي كيشنفر و يلعلع
و نسى راسه بللي راه غير تويس
بدا يتفش و يتنفخ
ما تگول غير رابوز و مبيس
~~~~~~
مللي جاو اهل العروسة
تمة عواجت 
و ف ذيك الساعة النيت
حضر الكبريت
ناضت قربالة
شعلت العافية
تحرگات النوالة
تفسخات الخطبة
و تفرتك العرَيّس
~~~~~
الراجي رمالي
22/04/2022
