وكالة الرأي العربي الإخبارية
زجلية: حروف القصيدة
ضربتني التفگيدة
و من حر الخوف
و من ذاك الجوف
طلعت تنهيدة
گلت آش هاذ المكيدة !!!
گالو تسلات روح المعنى
من كسدة القصيدة
و بقى كل حرف
بوحده فرادي
ينده و يدادي
على خوه ينادي
طاح الحا و بقاو غير الرسومة
بلا معنى فوگ ال….رَّفْ
المداد جف
المعنى كشف
قلّبت حتى لگيت الحا
وگلت أناي جمعت الحرف
طاح الفا و بقى غير الحَرّْ…
الحرف توضر
المعنى تقبر
بالزربة فاق الفا من التلفة
جا يطيح و ينوض
و گلت عَود ثاني
أنا جمعت الحرف
طااااح الرا و بقى غير الحَ…..فّْ
كل حرف على خوه تلف
حتى حد ما بغى يعرف
فين غاب الحرف؟؟
آجي نتجمعو و نتْلَموا
نردو للقصيدة معناها
گبل ما الحروف يتتموا
نجمعوهم حرف بحرف
تتوحد الكلمة
تزيان اللمة
و يبان الحرف
الراجي رمالي
29/04/2022
