على حرفي خفت.. رجل بقلم ذ. الراجي رمالي

زجلية: على حرفي خفت

بغيت لحرفي نشوف
سعدُه وسط الحروف
گاالو تمة طاح السعد
و على حرفي خفت
ليه مشيت نجري
تعكلت و طحت
~~~~~
الطيحة كانت طيحة كرت
طَيْحَة هرست ليا لعظام
راجلت ليا الكلام
دخت و تلفت
و على حرفي خفت
اتكيت و غمضت
و طااالت التغميضة
~~~~~
ضربتني التوكيضة
بغوتة طلعت من الجوف
گالت شلا كلام…
من طرز الحروف
مشات الدهشة طار الخوف
هذاك الخوف……
نقيته شوك من گْدامي
حيدته عگبة من گُدّامي
هذاك الخوف نصلته
دربالة ثقلت كتافي
جا الكلام الشافي
و الوزن الصافي
و طلعت شلة قوافي
~~~~~
هذاك الخوف…
سليته مسمار صَدًا ف نعالي
نتفتٌه شطب من فداني
كيف الرمص من عياني
جات تجري المعاني
حرف بحرف
كتبتهم شلا قصايد
و شاط الصرف
✍️✍️✍️
ذ. الراجي رمالي
14/03/2022