وكالة الرأي العربي الإخبارية
قلب الخال
…….
أجمل حاجة فى كل حالاتك
صدق القلب وراحة البال
الله يبارك فيك وحياتك
يا إللى شغلت قلب الخال
…..
قلب الخال عاشق من قبل
ما يشوفك ولا حتى يسلم
ياما دور عنك وإتمنى
وإستنى إنك يوم تتكلم
…..
قلب الخال مشتاق لك ياما
إمته يابدر يهل هلالك
والدنيا تفرح ويانا
لحظة ما تشوف بعيونها دلالك
……
قلب الخال إسم على مسمى
إللى يعيش فى رحابه يتهنى
وإللى هَيملك كل حنانه
هيعيش عمره كأنه فى جنة
….
قلب الخال معجون بالطيبة
ويابخت إللى تكون له حبيبة
هَتعيش عمرها منه قريبه
ويدعو لها كل الحبيبة
…….
قلب الخال عمره ما بيخون
ولا بيبيع ولا عمره يكون
ولا العشرة عليه بتهون
قلب الخال عاشق مجنون
……
قلب الخال واضح من يومه
والإخلاص واخده من كومه
مهما الناس عليه بيلوموا
يحلم بك حتى فى نومه
…….
قلب الخال مليان بالخير
ع الأحباب بيحوم ويطير
فى عشقه تشوفه ملك وأمير
قلب الخال طول عمره كبير
……
قلب الخال بيحب الناس
أصله رقيق دايما حساس
أغلى من اللولى ومن الماس
قلب الخال للناس ونّاس
……
قلب الخال ف الحق جرىء
عايش عمره نضيف وبرىء
واخد حبه تملى طريق
عمره مايعرف لحظة ضيق
……
قلب الخال أخضر وجميل
دايما عاشق سهر الليل
والأخلاص فى حبه دليل
للحلوين يعشق ويميل
……..
قلب الخال أبيض شفاف
ولا بينافق ولا بيخاف
ع الأحباب دايما ولّاف
أجمل من كل الأوصاف
…….
قلب الخال خيره ما بيروح
مهما يكون موجوع مجروح
نبضه بيسعد كل أحبابه
تشهد كل حروفه وتبوح
….
قلب الخال يجمع مايفرق
والحرف من إيده بيروق
إللى ماجرب شهد الكاس
أى كؤس تانيه ماهَتشوق
……
قلب الخال مخلص لأحبابه
عمره ما عنهم قفل أبوابه
مهما الدنيا ترمى حمولها
مابينساش ربه ولا كتابه
……
قلب الخال من بيت شعراوى
لا زملكاوى ولا اهلاوى
عاشق مصرى ومحلاوى
واخد العهد عن الشعراوى
