مَـحْـرَكْ_لَـكْـلامْ… زجل مغربي بقلم رشيد شرقان

#زجل_مغربي

الجزء الأول من مطولة

#مَـحْـرَكْ_لَـكْـلامْ

1_

الى كنتي عـلام ومْعنِّي بْعَوْدْ مْليح
هَا السَرْبَة وهَا الخيل معرشة واقفة
أراك البارود و الـدخان يديه الريح
ؤلا غَ لابس سلهام وداخلها مصادفة
خَايَّفْ من تْكَّبْ الخَيْلْ عَوْدَك يْجِيحْ
وعمارتك بين السروتْ تخرج خارفة

2_

يلا كنتي نظَّامْ وتحط لنقاطْ علحروف
ها لقلم معنݣر ولوراق مشبحة تشبيح
الورقة كيف المحرك وحواشيها صفوف
وَلَّدْ لكلام من عقلك وشطحو تشطيح

عند الميزان وَفِّي عبارك ؤوَجَدْ صروف
وياك تخسر مكيالو ذاك راهو فعل قبيح
ؤوخا لكفات امخالفة كُلْها بْهيتو معروف
هالحروف ثمنية وعشرين مسرحة تسريح
الى مرادك تركب سرج قلم معلوف

3_

لاقي ذا بذاك ورسم ع لسْطر عبارة
بني قصايد حالمة وختمها بقوافي
جبح الدِّيْ مايركع لمساومة ولا شطارة
اتدبر معانيه يا صَـاح،ايوَهْبَك الصافي
ماهو منبع فعماقو لخواض حاتل يتسارا
ولا هو ݣنس شحيح ف الحزة ايحافي
ماهو تاجر دخيل ف سوق معني بشكارة
الدي دوا للعليل المسقام و ليه يشافي
جيب كلامك رباعي حليب ب فرارة
و سوط عليه يزهر يلا كان طافي

4_

يلا كنتي زمام زمم كلامك أُعقَل عليه
ها لحروف ݣدامك مساوية ف الرݣدة عبار
زينها يسلي و يواسي اللي ضاق الحال بيه
المسكون بها تسيخ لُه دمعات بين لشفار
الورقة فدان و لحروف ربيعو ولمداد يسقيه
يمكن تردها بحيرة زاهـية ب الورد والنوار
السطر ساس والحروف وتاد و المعاني تقويه
الورقة عجنة ومدادها سيما و رمل ومزرار

5_

يلا كنتي مشرار و إيدك تسبقك
بلا سبة تضرب كل من حَـدَاكْ
أرض الله واسعة وجد عتلتك
كربلها تخضار خلّي يتْمر شقاك
ماشي الريح اللي صاط يدفعك
نفسك مامهنيها ترميها ع لهلاك
عمل و كد ب الجد في صغرك
سعى للخير و رمي الشر وراك
يضحك بزاف لي فلخّرْ يضحك
اتلى مغموم الى ماتبعتِ لِ بكاك
عمر قلبك ب النية ديما تسلك
تبرم عنك الضربة وتجي ف لِحداك
حبل النجا طويل يا صاح به تمسك
عا تسهى تتعكل وتطيح على ݣفاك

6_

دوي على حقك إلا كنتي مغوار
لا تسنى ذاك ولا حد يجي من هناك
الحق ك يتخاذ بزز من اللي جار
ولى هي عادة مرفݣاك من صباك
واش هي خلطة م إيد شاطر عطار،
ولى رخبة رضعتيها من صدر إماك؟
رباو فيك الخلعة من نعومة لظفار
صدقتي خرايف علغول ولخوف ملاك
ما عودو لك علعنتر لما يتشݣ له غبار
ولا على سيف بن ذي يزن وطرزان و هلاك
ما تعوذتي من شيطان و توكلتي عللجبار
قرينك عنݣتيه وفين ما راح معاه داك
واعدك بمنياتو،و بين ليك الدنيا نوار
ع رخيتي وراه السمع كتفك بحبالو و خلاك

7_

حياني ملوحدة وتفراديت فليلة القبر
يوم تخشع ليه لقلوب وعمالك لي تدي معاك
رافݣوك مالك وولادك ويشيعوك بلجهار
وبعد دفنوك كلشي راح و خلاك

كنتي لاهي وهاتك عرض الدنيا ونسيتي د النهار
للي ملكيته ما كفاك،و طمعتي فلي ف إيد سواك

8_

يلا كنتي بصح صبار واسي راسك
لا تسعگرشي من شي و كتم شكاك
راهوالصبر وسيلة ايوصلك لغايتك
دوا الذات لعليلة وخا طريقو شواك
حين يْغِير عْلَكْ لعدو ديرو سلاحك
يوقف للنفس الامارة ويحارب هواك
الى طارت لغبرة هرب للعگبة و رد بالك
حيت إلا جات الحملة تطلب عَ سْلاك
اتخبل ما اتحل و يتلف راس خيطك
اتسدى بلا منجج وتݣرج بلا فكاك

9_

الى كنتي معلم و فاهم وزع الكلمة
حرف ب حرف و ذوق لها المعنى
ولغى لرياحها وفهم آش طاري تمة
ضرب رباعي ف خماسي تخرج الغنى
ورينا كيف تتولد من لعقل الكلمة
وتنزع من لقلوب الرهيفة المحنة
يخرج ماهو زينة في لعياد واللمة
غربلها تليان كيف دكان الحنة
طلق السر لا تبقى معبس ك بومة
ݣلع منك الشر و غرس لمحنى

10_

إلى كان بصح كيهمك حالي وبالحق داوي
ها ساحة ݣدامك شوكها ايدمي لكدام
هذاك للي ضربنا ملي وصلو ليه الشكاوي
بعصاهم سوطهم ونقص لهم ف الجورني ايام
عجباتهم تبسيمة السبع و هو خزراوي
ثعلبو معانا بلا شرع وصبغو ايامنا بظلام
ايصبر لكيات روحو من كان لناس كاوي
جرحو يصير جرحين ولا يفاجي عنو زين لكلام
حفرتوا لينا شلا حفرات وخذيتو الرشاوي
تمعنو ف حفرتكم معتاها ما يعمرها عرام
ب لحجر والطوب المسوس بنيتو الخاوي
من هاجت الحملة عليكم راب سور لرسام
ها نتوما كيف ربيع ضربو الصهد الحامي
حانين ريوسكم ك النعامة و لايحين لعلام

11_

الى كنتي رسام ها الريشة ها للوان
وها هي للواح..من طبيعة خوذ شكال
تخيل وجوه راسخة ملامحها ف لدهان
وجوه اللي تگد تنسى وباش تنساها محال
وجوه نساتها الفرحة حتى غرقت ف لحزان
وجوه منعوتها مدموم سبابو ذا الحال
ماشي غ خربق ب شيتة وݣول أنا فنان
جرد مراسم اللوحة يمكن تخلد في البال

12_

الى كنتي ساقي وكاسك مكشكش رزة
ها المجمر زاهر لهيبو هاجرو الدخان
ها الصينية و الكيسان خوت ف الفرزة
و البراد بارز بيناتهم من البعـد يبان
عمَّر لجماعة كاس اللي ما ذاقو يتعزى
تلقيمتو بلدية منسمة بزعتر و زعفران
لقالب د السكر انمر وموالم ف البرزة
لون لباسو زرق شامخ يسلب لعيان
اتاي خضر مكركب كيلصق في الهزة
جغمتو كتمضغ تروي الحلق العطشان
ماهو أتاي رخيص عند بايعو همزة
كي الحنظل فشروبو يسحق المصران
ما يدزي ف جماعة ما ينفع ف حزة
ومطلوب ف لسواق ياسر كثير الهزان
شريه ما يعرف لامات،ما يعرف دزا الريال عندو عازو عن اهلو و القومان
وللي ما يحضر لك ف فرح ولا ف دبزة
حسن لوحو من بالك و محيه من لذهان

13_

يلا كنتي زجال وكلامك تحطو موزون
دور في جنابك وكتب قصيدة عل لحال
لحروف مرصعة صور ما تشاهد لعيون
رسم بسمة على لوجوه وعطيها آمال
تجينا لفراح تشالي بيا سلام ويخرج المدفون
من وست ايقاع بنادر وطعارج صدح بموال
وري لعالم غبينتنا و كشف ليه المخزون
تعرف الناس عيشتنا وشيعها بمزامر وطبال

14_

الى كنتي مسرار و ملامحك شراقة
بالقد المشدود تتباهى والشوفة الخلابة
لله اتواضع يا للي يخطو برشاقة
راه الجمال يفتن و أخطر من الوبا
كون مأدب لطيف تسحر لعقول بلباقة
وانت غير تضهصص كينك ف غابة
كون ظلك خفيف تبقى لقلوب لك مشتاقة
لا يكون دمك ثقيل رمياك لعباد بعيابة
إلا راح عليك لعمر ما تنفعك فياقة
دوزتي ايامك ساهي مالكاك غيابة
الخفة تجلب العين وتلوح لشهاقة
ويا ويح من شارت ليه الناس بسبابة
ينحل لَوْ يكون سمين وتصيبو فاقة
سول هل لقبور على العين العطابة
مدى من بير كانت مياهو رقراقة
منابعو عاطفة تجري كيف لعبابة
تبعو كحل الراس حتى صابتو محاقة
وكح من ماه ومابقات عيونو كبابة

#رشيد_شرقان