وكالة الرأي العربي الإخبارية
قصيدة زجلية بعنوان:ولد الذيب ما يتربى
الخيل الجامحة ما اتكسب فروى
ما تسگم بها سربة
والگمح المرومد مايتطحن
مايتباع ف رحبة
المنجج لمتول من يد الحادگة
ماشي من السدا ومن الكُبّة
وحلاوة لكلام في معانيه
ماشي في كثرت الكتبة
ولد الذيب ما يكبر مع غنم
مايتكسب ما يتربى
وقليل العفة والحيا ما تدخلو لدارك
ما يفوت العتبة
راه اللي يشطح ويغني مايضرك
وجهو ما يتخبى
أتاي لملقم والمشحر تيبان
غير من الكْبّة
راه العبرة ف لفعل ماشي
ف كثرة مرحبا
وحلاوة القرآن ف ترتيلو
ماشي ف كثرة الطلبة
الحديد العيان ما يسافر بيك
ما يطلعك عگبة
والرامي يبان من التسديدة
بحال الجويجة بحال بوحبة
ولباردي عند ندهة العم
وتخريجة العلفة ماشي
بالسلهام و بالركبة
والزين راه فعل وصفاوة لگلب
ماشي زعرة ولاشهبة
مني لصحاب لعقول النايرة
ماشي تطبال وجدبة
اللي بغا يتكلم يتكلم رزين
بس عليه من كلام الزربة
لكلام الزين يريح الگلب ولكلام
لخشين يخلي فيه الندبة
واللي بغا يعيش مرتاح يختار
خليلو
ويحسن معاه الصحبة
واللي بغا يتملق يعيش ذليل
مذموم
ديما حاني الرگبة
واللي بغا يتعلق فين يتفلق
تكون حياتو جحيم
نكيدة صعبة
حسن منير
