صباح الخير علي الجدعان
،،،،،،،،،،،،،،،،،،،
صباح الخير علي أحلي ولاد بلدي
وع الواد اللي مش من بطني لكن
هو ده سندي
علي النازل ف عز البرد من بيته
وماسك شنطتة ف ايده
بيسعي يكد علي قوته
ووسط النار يعافر برضه ويعدي
صباح الخير
علي الواد ال متغرب يجيب قرشين
يساند ف الحياة بيهم
يعدي اليوم كما السنتين
ومشتاق ييجي لحبيبتة
ومش طايل يشوفها يومين
صباح الخير
علي الشقيان ومتمرمط ف ساقية تدور
ولا مكفي ولا موفي ومتهدد بقطع النور
علي التعبان من الدنيا وم الزنقة وم الخنقة
وبين الناس يادوب مستور
علي المحسود وع المنظور
وع المجروح من الظالمين
واهله يولعوا له بخور
صباح الخير
علي الواقفين كتير طوابير
بيستنوا يطولوا معاش
لسيد الناس يقبضهم ويستنوه ….
يقولوا مجاش
وراجل شيب وقلبة مريض بيستني
وقابلني .. يومين لوعاش
صباح مفيهوش أمل ولا خير علي الاوباش
وع اللي خلوا اولادنا يروحوا بلاش
علي ظالم نهب خيرها
وادي طرحها لغيرها
ولاعب بينا ومصيرها
وعامل فيها قال طيب واهو غشاش
صباح القطن والمانجة بتتصدر
وطفل يادوب بيتهجي و متكدر
وناس محتاجة لولادها ولا بتقدر
وخير بلدي كتير لكن … بيتبخر
صباح فواتير تدق الباب
ل مية ونور وناس واقفة علي الاعتاب
تطالب فيك ولا تقدر ف لوم وعتاب
صباحك حر يابلدي ولكن
سجلوه ف غياب
صباح يتمني ييجي النور يلاقي أمان
ويتمني يزيل وجعه .. كأنه م كان
صباح الخير
علي الشقيان وع التعبان وع الجدعان
وع اللي صاحي
من بدري بيسعي
لجل ما يتهان
صباح يتمني ييجي الفرح نتهني
ونوصل فيه لبر أمان
صباح الخير علي الشقيان وع الغلبان وع التعبان
صباح الخير
علي احلي ولاد بلدي
صباح الخير
علي الجدعان
بقلم الشاعرة # ميمي عبدالجليل ّّّّّّّّّّّّّّ