وكالة الرأي العربي الإخبارية
ياطيب
====
أنا العاشق لكل خُطاك
وياتمني أكون وياك
تعيش طيب
ويحلي العمر ياطيب
تملي معاك
وباستناك
وباتنشق نسيم عطرك
أنا نفسي نعيش قلبين
بروح واحده
واتركلك أنا أمري
وتملك بهواك عمري
وتبقالي كمان قمري
وأكونلك نسمه مبتسمه
تطوف حواليك
وتفضل ليك سهرانه
وعينها عليك
تجافي النوم عشان تحميك
وتبقالك أنيس لياليك
وباتمني اكون قربك
عشان قربك
باحس الكون بقي ملكي
واشوف الكون بيضحكلي
وباتمني اكونلك شمس ف نهارك
قمر ونجوم
تضويلك ضلام ليلك
عشان قربك باحس الدنيا
دي معايا
واكون منك انا قريب
تعيش العمر ياطيب
تداوي جروحي وتطيّب
ياحلم جميل
وفيه مواويل
ف عز النوم يصحيني
ويشجيني
وم الاحزان بيبعدني
يداريني
يابسمة شوق بترويني
انا ف بُعدك
دموعي سيل بتكويني
ومين بَعدك هيرضيني
انا ف بُعدك باكون حزنان
ولما تعود
نغم عودك بيطربني
لدنيا الشوق يقربني
واكون كالطير ف قلب سماك
وفارد ف الهوا جناحين
يروح علي فين
ومش خايف
مادمت معاك
باحس الكون بقي ملكي
ولو نظره من عيونك تكفّيني
ولو بسمه بترضيني
وراضي معاك
ويوم ما لقاك يكون عيدي
نعيم الجنه دا ف إيدي
تعيش العمر ياطيب
تداوي جروحي وتطيب
شعر عامي- محمد حسن فرغلي
