وكالة الرأي العربي الإخبارية
زجلية: { آآآه يا زمان }
كثروا فيك القراية
هذا قاري حسابو
مزيااااان
هذاك قاري قرايتو
قراية مقلوبة
إرادة مسلوبة
على أمرها مغلوبة
اﻵخر بالتسبيح قاضي حاجتو
الدنيا بوسخها رامتو
واحد قاري الربعات
الطايبة ما متعرف فين تبات
اللسان طويل العينين خارجين صحاح
بيني و بينكم هاذي قراية بكري ف الملاح
☆☆☆☆☆☆
يا بويا ما يكون باس
تبدلات الوقت بلا قياس
بانو شلا مواس
كلا و كيف يحسن
هذا بلا ماء يحسن لليتامى
و حاط عينيه على الزعامة
هذاك يحسن بموس حافي
خوى المطامر وكح المطافي
و ف راسو ماااادة من حرافي
هاذوك يحسنو باللي كاين
يحاتفو و يعطيو للخراين
واحد آخر كيحسن بالموجود
ما يعرف لا امبارك لا مسعود
الداخل مفقود الخارج مولود
☆☆☆☆☆☆
تفرتكت الخيمة ما بقات خاوة
حيث حمارها رشى و طاح
و من تمة بدات العداوة
هذا كال ما هزت الزكاوة
هذاك مص كاع الحلاوة
و اﻵخر لجيبك يحلب بالطراوة
و اللي على باك حوطو على ليقامة
و احنا لاحونا للقمامة
☆☆☆☆☆☆
و شحاااال منك يا حضية
حضية تابعة حضية
و الحضاي ف راس الكدية
ما تسمع غي حضيني نحضيك
و تخثل ليا نتخثل ليك
تفرجو فذوك الغدادير
أنا وحدي ما عندي ما ندير
كل غدار حاط تحت منو كرت
واش نفضحهم و لا نسكت ؟؟؟
الراجي رمالي
09/10/2020
