وكالة الرأي العربي الإخبارية
العامية
المصرية
#أنا_ودمعتى
من يومين
كان نفسى أبكى
بس الدمعه قافله السد
معندانى
وااااااااه يانى
لما الدموع بتتحول
من ميه سايله لبحر جماد
وكأنى
أنا وهيه ف حرب عناد
يبقى القلب عمال يبكى بحرقه
وهيه ساكته وبتضحك
زى الأم تمام
لما العيل يفضل يبكى ع الحاجه
وهي تطبطب بكفوفها وتقوله سد
مش عارف اقولك يا دموعى
بوحى
كسرى متاريس الكبر وبلاشى عند
مش قادر اوصف لك
حال قلبى كيف
وكأنى وكأنك اتنين أغراب
واحد مبيسمعش والتانى بيسمع
بس كفيف
واحد منيهم غاوى يبان على غير حاله المزروع جواه
والتانى الآه عشقاه
ومعيشاه طول العام فى فصل خريف
والقلب يا ولداه
بينى وبينك محتار ومشقلب
تاره بيسكت وتاره تانيه
يبقى عاوز يصرخ ويقول يا لطيف
هو إنتى فاكره يا دموعى
إن أنا مقدرش انزلك غصب
دا انا حتى قادر اخليكى شلال
وف ترعة خدى المحفورة
اصبك صب
بس من ميته الغصب بينفع عاد
من ميته الزاد لو عافه الجوف
ينفع للأكل
على كلا خليكى مكانك
مسيرك يوم ما هتنزلى راضيه
وكمان هتقولى
كان عندك حق
أصلك يا شقيقتى منتيش فاهمه
ولا عارفه لوين وخدانه الدنيا
على طول ف خناق
لا ف يوم قدرنا نتفاهم
ولا متفقين نريح بعض
طب إنتى عارفه من ميته محستكيش
من يوم الأحباب ما غابوا عن الدنيا
سنين عاد فاتت واحنا شيلين من بعض
ابقى نفسى اقابلك وانتى ولا انتى هنا
واللى بيهون عليا فراقك
قلبى المسكين
مهو ماشى معاى
بخطره مش بخطره ماشى معاى
يمكن كمان اكتر منى شايل الطين
وقت الحزن لما تغيبى يحل مكانك
يسكن بركانك وميبطلش عض
وأنا والله احترت معاكى
كيف انتى منى ومن روحى
وواخده الضد
طبعك غريب يا دى الدمعه
تبقى قاعده وشايفه وسامعه
وبانيه بينى وبينك مليون سد
على قولك ما قالوها زمان
مفيش حد بينفع حد
لكن حتى الدمعه يا ولاد
حتى الجوف بقى كاره جوفه
يحس بحاجه وينكرها
لأ وكمان تكتر سكاكينه فى وقت الفرح
وكأن الجزر ميعرفهوش ميجيش يتحنجل غير ف المد
بقولك ايه
تعبت يا دمعتى يا حزينه
والله تعبت
امانه عليكى يا تكونى حنينه
يا تفارقينا
وأنا وقلبى لينا رب
#الطيب_عوض_أحمد
