وكالة الرأي العربي الإخبارية
زجل
قصيدة بعنوان : أوف
(من ديوان الجمرة )
بيني ؤ بينك لحروف
أوف منك أوف
خاب الضن فيك يا عشيري
نسيتي المعروف
ؤ الكلمات الطاعنات فضهري
بمضاوت السيوف
نحسب العشرة من عمري
زمانها مخطوف
ؤنجاوبك علاش يا زهري
سعدي معكوف
محزم بالنحس بلا ما ندري
ؤ شادو بالكفوف
بيني ؤ بينك لحروف
أوف منك أوف
ياك لفضل للكصبة اللي بلقلام
علينا تروف
ؤ الورقة كمرة فليلة التمام
ؤ السمق من الصوف
ؤ الدواية كعبة ليل مضلام
تشالي بالخوف
ؤ انا الراكب بحر لكلام
نلبي ؤ نطوف
وارد زمزم لمعنى فالمقام
ؤ رامي الجلوف
بيني ؤ بينك لحروف
أوف منك أوف
آجا ما يطفي عوافي لقوافي
الشاعلة فالجوف
ؤ لقلم يفضح السر الخافي
لمخبي مكشوف
شلة حسبتها ذهب صافي
من قلة الشوف
بأن صداها ؤ لسانها الحافي
يلهت ملهوف
سديت بوابي على كل جافي
ؤ سديت نيوف
أوف منك أوف
عبدالله إضامر
(المغرب ).
