وكالة الرأي العربي الإخبارية
الصنف ..شعر عامي
النّْظَر ..متعوسْ
هزيت الراية وكَلت التسليم
عللِّْي كثرو لملحة في الدوايا
عللِّي نعسوا سهوة ولخيل جرّايا
خانت الشوفة والشوفة هبيلة
تشرَّف بسيدي و لالة
ترعى النور قبالة
ماشي كلشي ميزان
ولعوج منا سبولة شيطان
طاح لحرف مني يتنخصص
كَُدام ليل لعناد
تحت سقف الركَاد
والروح مزرارة في قوس
جباد
كن مع لمولى ونيس
في غربة الروح
وصحابك في لعشرة ألف
بللخدع سم في دموعك
تحسب ألف وألف ونت تالف
تلقى في لعكَْبة واحد
ودعوة بوك
وموك رامية لك السالف
ضرني خيلوطة بوعفاس
وكنت صاحب الطالع
في جوفي طعام مساس
علم الله اش من كلب والع
ضربو الرش ونعتوا
ودارو فوق راسي تاج مغروس
بلمكايد
بلمكر
وطوفوني بين جبل منحوس
انا والكلمة تبكي
انا والوليعة تشكي
حتى شكيت
لمداد سم
لورقة كفن
والخاطر عدو
هادشي علاش
ولى فينا
النظر متعوس
فؤاد البياز القاسمي
