بابِ الأمَلْ
*******
يا ليلْ بِكْفي سَهَرْ بِهْدايْتَكْ كافي
ما عادْ فِيّي خَلَصْ ما حَلَّكْ تْجافي
وَجَّعْتْ قَلْبي الْخَلي هَدِّيتْ فِيّي الْحيلْ
سَهْرانْ قاعِدْ مَعَكْ بَسِّ الْجِفِنْ طافي
ــــــــــــــــــــــــــــــــــــــــــــــــــــــــــ
شَرَّعْتْ بابِ الأمَلْ عيني عَنَجْمِ سْهيلْ
شُفْتِ بْعُيوني الْقَمَرْ عَسْطوحْنا غافي
فَكَّرْتْ لَوْ هَالْقَلِبْ ما ذاقْ طَعْمِ الْويلْ
لَوْ ظَلّ أبْيَضْ نَقي مِثْلِ الثَّلِجْ صافي
ــــــــــــــــــــــــــــــــــــــــــــــــــــــــــ
أهينْ عَالْمُبْتَلى ما أطْوَلَكْ يا ليلْ
دَمْعي عَخَدِّي نَهِرْ سَحْسَحْ على لْحافي
لَكِنْ نَصيبُ و قَدَرْ وِالْحَظّ ميلُ و ميلْ
رُحْماكْ لَجْلِ النَّبي مِنْ سِرّّكِ الْخافي
ــــــــــــــــــــــــــــــــــــــــــــــــــــــــــــ