بضمة إيد …بقلم الشاعر مصطفي تيسير….

رد علي قصيدة الفنانة الرائعة ولاء عدنان ** لمسة إيد ** من ديوانها الجديد ( جارِتسجيل الخروج )

بضمة إيد
و عين تحضن سواد العين
و بحر الشــوق و مركبتين
و روح واحـــــــدة بتتقسم
علي الجسدين
تدور في الروح سواقيــها
و تسقي أرضنا العطشانة
للضمة و ترويها
فـ نبدر فينا أشواقنا
و نحصدها و نجنيها
فيتحول لقانا لعيد
بضمة إيد
بتتبعتر مراكبنا
و بتودينا و تجيبنا
و تتغير حاجات فينا
تأخدنا بعيد و ترمينا
و بحر هواكي بلا مينا
ما بين النشوة و التنهيد
بضمة إيد
ما بنفكرش في الأيام
فـ بيتحول لقانا كلام
و نغزل مـ النجوم أحلام
و نبقي للقمر خٌدام
نصلي العشق في ميعاده
نروح للحب في بلاده
و نتصاحب علي الحواديت
و يبدأ حلم يتكون بطفل و بيت
فـ ليه إنتي إللي بالتحديد ؟
بضمة إيد
بتتبدل ساعات الكون
و نتصاحب علي التواريخ
ياخدنا معاه علي بكرة
و يحدفنا علي المريخ
نشوف الدنيا مـ الشبابيك
نلاقي نفسنا رجعنا كما المماليك
أسرنا الشوق و بيبيعنا كما النخاس
و تيجي إزاي مادمنا بنملك اللاحساس
وأنا إللي بحارب الوسواس
مافيش ليا في هواكي شريك
تحولنا الليالي عبيد
بضمة إيد
بشوفك زي شجرة در
يا سلطانة علي عرشي
أنا وياكي ما أقدرشي
يأخدني الفرح وياكي
و سايبلي المر
خيوط الوقت ليه بتكر
و سايبة دفتر المواعيد
يا نجمة عالية لسه بعيد
بحبك إنتي بالتحديد
بضمة إيد
بقلم .. مصطفي تيسير