الرئيسية » أدب الكتاب » خليوني نقول..زجل مغربي بقلمي: فدوى گدور

خليوني نقول..زجل مغربي بقلمي: فدوى گدور

زجل مغربي بعنوان: خليوني نقول
بقلمي: فدوى گدور

جيت نقول ليك يا مرا شي كلام
كلام حقيقة… ماشي أوهام
كلام واقع… ماشي أحلام
جيت نقول ليك يا مرا شي كلام
كاينة لي تقول عليه حكم
وخا أنا مَا ديا ما جايبا فالزمان
وكاينة لي تقول فيا الفهامة وخفة اللسان
و عليكم أنا بغيت نبان
جيت نقول ليك يا مرا
لا يغرك نقش البيباب
تْريات نحاس… دروج رخام
راه شي عقول مظلمة
سراجم حديد وقظبان
جيت نقول ليك يا مرا
لا تعجبك جرادي… ومحابق العتابي
تقولي فيهم نغرس النعناع والسوسان
راه شي قلوب صْحَاري
عمرها تروى… وخا تسقيها من عيونك وديان
جيت نقول ليك يا مرا
لا دوخك ريحة المسك
وتبرهك جلابة البرشمان
راكي تجدبي…بلا جاوي بلا صلبان
ويقولوا هذا هو حالها من زمان
ودابا عاد ظهر وبان
جيت نقول ليك يا مرا
لا تركبِ سفينة البهلان
تعاندي مع الشمس هي تغرب وأنتِ تشرقِ
تقولِ للدنيا:سيري بيا… القمر رهن يديَا
ريح الطمع والغرور يديك للغيران والكيفان
تندمي…ما تنفعك ندامة
تولي ضحكة للعيان…شفاية للعديان
اِييييه…عارفك ݣادة وحرااااايمية
ميݣد عليك لا إنس ولا جان
سوقك قالو عليه… لي دخل ليه…
خارج خسران
ولكن عارفك نية وحنييييينة…
دغيا تخبل خيوطك…كِ يبدا طرز الكلام
إِوا….بلا منتلام… وخليوني نقول
كلامي غِ كلام والكلام معليه حكام

ملاحظة: اللوحة المرافقة من أعمالي 🌹الأحد 12 مارس 2023

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.