سنة جديدة (زجل ),,,,,,, للشاعر على مصطفى…. وكالة الراي العربي..

سنة جديدة :- للشاعر على مصطفى
========
( ومستنى سنة جديدة )
أغير فيها احساسى
وأصحح خطو أقداري
وأطفى م الهوى ناري
وأعدل سيرى من تانى
ما بين راسي ..
وبين ساسى
والملم فيها أشلائي
وحبي اللي كان باقي
والم العيلة زى زمان
ونحكى حكاوي جدتنا
وكان يا ما كان !!!
وأرجع فرحة اللمة
وود الجيرة والأصحاب
وأزور الخالة والعمة
ونفرح بالحصاد تانى
ويوم السعد يوم ضمة
ونتجمع في وسط الدار
ونعلب تانى شخليلة
وتجمعنا بها العيلة
وأحب جارتنا سعدية
وم النسمة عليها أغار
وأخبى فرحتي ف قلبي
وأفرش سعدي في الدوار
وتمْلَّىَّ الدنيا ضحكتها
هنا وعمار
.
ونفسي كمان
أحقق كل أحلامي
وتسعد فيها أيامي
وترحل عنى آلامي
وأشوف الفرح حوالية
ما فيش إرهاب !!! ولا تفجير !!!
ولا مراقب حياتي خفير ؟!
وأصحى في النفوس ضابط
كان أسمة ضمير
عمرة ف يوم ما كان يعرف
غنى وفقير
ونعمل زفة فلاحى
أنا والبت سعدية
ونشرب من دفا العيلة
ولمة غدوة تجمعنا بطبلية
وأزور الغيط
وأملى عنيا بالخضرة
وأصلى على النبي المختار
وذكره يسعد الحضرة
مدد يا ست يا طاهرة
.
ونفسي كمان ؟!
أسابق ع الشطوط الموج
وأشرب م القنا تانى
وأخضر أرض أجداى
اللي عانت من جفاف النيل
ولسه ياما هتعانى
وأرجع ذكرى عجباني
صباح … وفريد
حليم … وأكيد
ثومه … ووردة . من تانى
وأنسى الطشت لو قلى
بحبك مرة يوم يا حمار ؟؟!
ما أنا عن أصلى لازم أغار
وأنسى الشبشب أبو صباع ؟!
وعندي ظروف ؟!
ما أنا على ولدى متحير
قتلني الخوف
صحيح الدنيا دوارة
وأنا نفسي السنة دية
تلف وترجع الحارة
وألاقى الحب زى زمان
ما أقولش في مرة يا خسارة
ما أقولش في مرة يا خسارة
.
#على_مصطفى؛
3 / 1 / 2018 م
.