# طرز الحروف #

يا عاشق مألوف الكلام
*يا بو قلب طاهر و صافي
خوذ لك حرفة من الحرافي
*كيف سلافك و سلافي
تعلم الحياكة و طرز الحروف
*كون سباح ف بحور القوافي
بيها خالط الناس الأشراف
*فالدشورة يا خيي و البوادي
منهم تتعلم فن الكلام
*وتشرب قاموس المعاني
يا ذواق الحكمة و الكلام
*غني على سرب الحمام
يرجع لينا رمز السلام
*حتى حد فيكم ما يتلام
و باش يعم الخير و يعود
*غني عالخيل و البارود
ثرات و تقاليد خلاوها الجدود
*مع أهل الكرايم و الجود
مجاديبنا هزو العلام
*لفن التبوريدة يا سلام
صربتنا رايسها علام
*خيالة بمكاحلها تشالي
الخيل تجري و تجاري
*البركي و اﻷدهم يا غالي
تمة تزيان لمة الحباب
*من كل فج بعاد و قراب
المجاديب قنديلهم ماهو طافي
* الكصبة تحير و الكدم حافي
مع أهل النكتة محلاها لمة
*لمة الحلاقي و الحكاوي
برارد أتاي منها صواني
*مجامر تلهب عليها مشاوي
نسوان و صبايا و نقش الحناني
*مباخر بعود القماري و الجاوي
يا عاشق مألوف الكلام
* خوذ لك حرفة من الحرافي
الراجي رمالي