أخر المستجدات
الرئيسية » آخر الأخبار » ما أعجبنى …. بقلم الشاعر محمد رؤوف…وكالة الراي العربي..

ما أعجبنى …. بقلم الشاعر محمد رؤوف…وكالة الراي العربي..

ما أعجبنى .

تقدر تقول الشعر مدهش
مختلف
لو قلت أقدر
عايزك تقول الشعر فى الحشرات
اذا تغنى للحشيش لاخضر
عايزك تقلد ضحكة القطه
اذا ما تلاقى صدفه
سلسلة سمكه
ورينى تقدر بإيه
ترسم أنين الوقت
اول مايقرص عياله عقربين ساعه
سمعنى كلمه تحل ادم م الهبوط للارض
سمعنى كلمه تحنى ابليس اللعين
وتجبره يسجد
وترحمه م الطرد
مش بالضروره تكون بتعرف
ترمى ع الترابيزه نرد
لكن ضرورى ان اسألك
تعرف تقول الشعر طازه
وتخرجه بره الإزازه وتسقى بيه الناس
تعرف تقول مثلا
اننا ممكن نكون زى الهوا شفاف
مش كلنا بنتشاف
مش كلنا متجسدين
مش بس يكفى ان احنا لينا ايدين
علشان نطول القمر
تعرف نمر تليفون نكلم عبرها
آخر أمل ينفع
طب مين هيدفع مننا حق المكالمه
او مين فى عز الضلمه هيكون الدليل
دوقنى غنوه للوطن تمره
دوقنى غنوه للوطن جمره
دوقنى غنوه للوطن خمره
بس ف عذوبة النيل
دوقنى باقى الاغانى فى الحضر
زى الغابات
أقصد بصوت الفيل
تعرف تصر الشعر م المنديل
تعرف تطلع شعر من جيبك
ومن كم القميص
تعرف تطلع شعر شكل الحمامه
تعرف تطلع شعر فى الزيطه
تعرف تطلع شعر م البرنيطه
تعرف تفك الشعر م التكتيف
كييف انا قول الكلام الغير مهيأ
وبحب أتريق
وبحب اشوفك وانت بتطلع درر
من عبك السرى
وبحب دايما اسألك
تقدر فى من سرقوا الفرح من وسطنا تعرى
حاول بصوره تغير المعتاد
حاول تجنب اى شئ متعاد
حاول ميعاد انطلاقك يبقى غير معلوم
حاول تقوم بالثوره جوه الشعر
حاول يقوم الشعر من جواك بثوره
اعمل مناوره بالحروف ضدك
ادخل ميدان قدك
او لو مهوش قدك
ادخل مغمى الحذر
واللى انتويته اعمله
واذا زاد صراع الذهن عادى اتحمله
واللى ابتديته كمله
تعرف تقول اللى قلته
زى اللى فات بالظبط
من غير تشابه مفردات
تعرف تخلى النبات
يرقص باليه
تعرف باليه البحيره
طب خدنى ابوس البجع
ماتجيبش سيره
نيمنى تحت الحصيره
واركن عليا التكاوى
عيشنى فيك العجب والمعجزات
وارسملى ذات الحاجات بالوارب
وارسم ايشارب لجمله مرعوبه
وارسملى خط العمر دايره
وارسملى دايره يفنى فيها العمر
وارسملى عمر بدون ماترسم خط
وارسملى شط وطفل من سوريا
وارسم دراع الفرات على كتف ليبيا
وارسم جولان
وفلان
راشق فى جسمه السلك وهو بيعدى
وارسملى جدى
واقف مكان دليسيبس
وارسملى لبس الملايكه
ونزله موضه
تليق على الشهدا
وارسملى كف وزينه بطوبه
وارسملى قدس ومصر وعروبه
واسمحلى تانى اسألك
تعرف تقول نفس القصيده
بس مقلوبه

بقلم الشاعر محمد رؤوف.

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.