أخر المستجدات
الرئيسية » آخر الأخبار » مشاهد… عامي بقلم الطيب عوض احمد

مشاهد… عامي بقلم الطيب عوض احمد

عامية ….
….مشاهد
المشهد الاول
بحر غضبان وليل حزين
ورمله تعبت من الكلام
اللى انكتب فوق ضهرها
ويا دموع المجروحين
أحضان كتير داست هنا… على وشها
لجل تروى عطش المحرومين
وفى آخر الليله
المد يجى …… يغسل بموجه
كل الامانى والاغاني والانين
………….
المشهد التانى
على مدد الشوف
زرع كان أخضر
ماتت عيدانه من سنين
وساقيه كنا بنلعب جمبها
نركب على ضهرها ….. فتلف بينا
ولا عمرنا كنا بننزل مدروخين
كان الصبا ……
حاضن أمل بكره اللى جاى
كان يزرعه فكره فى قلب
يطرح غناوى تتعزف
فوق ناى حزين
كات السنين ….. مجرد عدد يتقال وبس
والعمر واقف عند خط الحلم
مستنى يعبر
لحظه شروق الشمس من عرق الجبين
…………….
المشهد التالت
قلب أبيض بياض التلج
بيوزع رضا وحنين
وعنين فرحانه طوالى
مع إنها غرقانه دموع وأنين
بتحارب مع الأيام
وخايفه أولادها يصيبهم شي
فتحضنهم تدفيهم
فى عز البرد بنن عيونها تغطيهم
وتدعى ربنا ليهم ما يكونوا من التايهين
ووقت الفجر تقوم لجل ما تصلى
وتدعى يارب احرص اولادى
وهما وراها يردوا
يا مصر آمين
#الطيب_عوض_أحمد

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.